Ti es Pedro, e a ti hei dar as chaves do Reino dos Ceos - Mt 16, 13-20

Domingo 21 de Ordinario - ciclo A

COÑECER A XESÚS

Hai moitos cristiáns que andan a cegas,

sen nada saberen do mestre que os leva.

E hai outros moitos que pensan que o saben,

e andan moi lonxe de ter a verdade.

Quen sabe de amores senón o que ama? ­

Quen sabe de dores sen eles na alma?

Quen sabe de loita se nunca loitou?

Quen sabe de fillos se nunca fillou?

Coñece a Xesús quen o leva dentro,

quen fai por seguilo en ditos e feitos.

Coñece a Xesús quen fai irmandade,

quen loita por que haxa maior igualdade.

Saber de Xesús tamén pide esforzo,

cómpre poñer medios con teima e con gozo.

Saber de Xesús é un gran regalo

que Deus nos concede se non nos negamos.

Xesús é o Fillo de Deus entregado,

defensor dos pobres, de Deus namorado.