Quen veña comigo non terá fame e quen crea en min non terá sede - Xn 6, 24-35

Domingo 18 Ordinario -  ciclo B




ANDAR CANDA TI

Xesús somos peregrinos contigo,
tras de ti, tralas túas palabras
e a túa maneira de vivir,
senón co corpo si coa idea e o desexo.

Xesús, somos beneficiados
pola fondura agarimosa do teu corazón,
tamén nós que dalgún xeito
estamos mancados na vida.

Xesús, contigo aprendemos
a ollar á xente con tenrura,
solidarizándonos cos seus gozos e tristuras.

Xesús, acollemos o teu mandato
de atender á xente cos medios
e posibles que dispoñemos,
sen deixar para outros
o liberador exercicio do amor.

Xesús, onda ti aprendemos
a valorar o pouco que temos, e enchémolo
do multiplicador espírito do compartir.

Xesús, na túa compaña comemos e bebemos,
facemos familia e comunidade,
bendicimos a Deus e fartamos á xente.

Xesús, cantas cousas boas aprendemos cabo de ti!
que satisfacción máis grande é andar canda ti na vida!  


Comentarios

Publicacións populares